ledena, sura grota
rascipana od žulji
kako ruka težaka,
več puti škartana,
ča ima za povidati
nikad pitana...
grota, uluštrana,
z anđelon milovana,
suzon uplakana,
imenon čovika napišena,
i vajk za potribu trošena,
svejeno kadi se našla,
skupa z vodon, arijon i
zemljon šerija, u more
kako stina preseljena,
z vitron i črnin oblaki ratovala,
koliko je samo na ten svitu dala,
i kad šoldi ni imala,
prsti koščati meštra, zavajk
njoj nude postelju i kušin,
glade je koliko pita, a pot
samo kaplje, cidi se po njenen
ubrazu, samo oči zgorun ubrne
doklen anđeja milošču je čuva....
....................................................