Strah
strah se vu kosti vrinul
Škripi kak staro drievo
pod severem v zimi
Lušči se kak kora
z debele bukve
Zatire smieh i radost
grebe po podu
kak stekla lisica
gda plien išče
Strah se pod strehe zavlekel
vu gajnke vu štale vu misli
Nie moči mam zaspati
vrti te kak veter klopotec
kak rieka vir
kak mati diete na vrtuljku
I diete se boji
išče sreču vu oku matere
a sreče nie
samo megle
i rosa se megli
i vusnice su bliede
ruke drhteče
Nekak je najbolje da čkomi
da se v kutu z novim medekom
igrati navči

Ljubica Ribić